Niyazi Əmirbəyov ali təhsilini Bakı Dövlət Universitetində "Biologiya Elmləri" ixtisası üzrə bakalavr və magistr dərəcələri ilə başa vurmuşdur. Daha sonra Azərbaycan Dövlət Neft Akademiyasında "Offshore Dəniz Təsisləri Mühəndisliyi" ixtisasını bitirmiş və təhsilini Duke Universitetində davam etdirmişdir.

Karyerasının böyük bir hissəsini — təxminən 20 ilini — "British Petroleum" (BP) Azərbaycan şirkətində müxtəlif rəhbər vəzifələrdə çalışaraq keçirmişdir. Bu müddət ərzində o, idarəetmə, əməliyyatların təşkili və beynəlxalq tərəfdaşlıq sahələrində zəngin təcrübə toplamışdır. Həmçinin, ABŞ-ın nüfuzlu şirkətlərindən biri olan GLG-də məsləhətçi kimi fəaliyyət göstərmişdir.

Hazırda Niyazi Əmirbəyov Agro Dairy Qrupunun Baş İcraçı Direktoru vəzifəsində çalışır. O, şirkətin strateji inkişafı, əməliyyatların idarə olunması və innovativ təşəbbüslərin həyata keçirilməsinə rəhbərlik edir.

Kristof Hartiq kənd təsərrüfatı sahəsində uzun illər ərzində zəngin təcrübə qazanmış mütəxəssisdir. O, Vyana Təbii Sərvətlər və Həyat Elmləri Universitetinin (BOKU) məzunudur və ixtisaslaşmış biliklərini real təsərrüfat sahəsində tətbiq etməklə tanınır.

Kristof Hartiq uzunmüddətli fəaliyyəti ilə “Agro Dairy” Qrupunda kənd təsərrüfatı üzrə baş məsləhətçi kimi mühüm rol oynamışdır. Hazırda Aqronomik Şuranın fəaliyyətinə rəhbərlik edir və Baş İcraçı Direktorla yanaşı, idarəedici direktorlara da bitkiçilik və heyvandarlıq sahələrində strateji və əməliyyat yönümlü məsləhətlər verir.

Ramil Məmmədov 25 illik peşəkar fəaliyyəti ərzində kənd təsərrüfatı və sənaye sahələrində müxtəlif rəhbər vəzifələrdə çalışmışdır. O, Agro Dairy Qrupunda Əməliyyatlar üzrə Baş Direktor, sahə meneceri, həmçinin neft və qaz sənayesində idarəedici vəzifələrdə və beynəlxalq konsaltinq layihələrində uğurla fəaliyyət göstərmişdir.

Ali təhsilini Azərbaycan Dövlət İqtisad Universitetində və Azərbaycan Dövlət Neft və Sənaye Universitetində almış, daha sonra təhsilini Tallin Menecment Məktəbində davam etdirmişdir.

Hazırda Ramil Məmmədov Agro Dairy Qrupunda Bitkiçilik bölməsi üzrə İdarəedici Direktor kimi fəaliyyət göstərir. O, bitkiçilik sahəsində aktivlərin idarə olunmasına, strateji planların hazırlanıb həyata keçirilməsinə, əməliyyatların səmərəliliyinin artırılmasına və məhsul keyfiyyətinin yüksəldilməsinə cavabdehdir.

Maşallah Tağıyev ali təhsilini Marmara Universitetində bakalavr, Sabancı Universitetində isə magistr dərəcəsi ilə tamamlamışdır. Karyerası boyunca “Kont Bilişim Teknolojileri ve Dış Ticaret A.Ş.”, “British Petroleum” və bank sektorunda müxtəlif vəzifələrdə çalışaraq geniş təcrübə qazanmışdır.

Agro Dairy Qrupuna qoşulmazdan əvvəl “Agro Trade Supply” şirkətində Baş Direktor vəzifəsində fəaliyyət göstərmişdir.

Hazırda Maşallah Tağıyev Agro Dairy Qrupunda Taxıl Emalı bölməsi üzrə İdarəedici Direktor kimi çalışır. O, bu bölmənin aktivlərinin və əməliyyatlarının idarə edilməsinə, məhsul keyfiyyətinin və əməliyyatların səmərəliliyinin artırılmasına, eləcə də strateji təşəbbüslərin hazırlanmasına və icrasına rəhbərlik edir.

Rauf Mayılov ali təhsilini Azərbaycan Dövlət Aqrar Universitetində və Almaniyanın Weihenstephan-Tətbiqi Elmlər Universitetində almışdır. Təhsil illəri və karyerası ərzində Weihenstephan Tətbiqi Elmlər Universiteti, GIZ, TU Munich və Josera GmbH & Co. KG kimi tanınmış qurum və şirkətlərdə çalışaraq kənd təsərrüfatı sahəsində dəyərli beynəlxalq təcrübə qazanmışdır.

Hazırda Rauf Mayılov Agro Dairy Qrupunda Heyvandarlıq bölməsi üzrə İdarəedici Direktor vəzifəsində çalışır. O, heyvandarlıq təsərrüfatlarının gündəlik əməliyyat fəaliyyətinə rəhbərlik edir, əməliyyat səmərəliliyinin, məhsuldarlığın və keyfiyyətə nəzarətin artırılmasına, eləcə də strateji təşəbbüslərin həyata keçirilməsinə cavabdehdir.

Azər Vahabzadə Münster Universitetinin məzunu və CIMA akkreditasiyasına malik sertifikatlı peşəkardır. O, müxtəlif ölkələrdə və sənaye sahələrində maliyyə meneceri və maliyyə direktoru kimi fəaliyyət göstərərək geniş beynəlxalq təcrübə toplamışdır. Liderlik bacarıqları xüsusilə maliyyə idarəçiliyi və nəzarəti sahələrində ön plana çıxır.

2022-ci ildən “Milla Dairy” şirkətinin Baş Direktoru vəzifəsində çalışmış, bu müddət ərzində süd məhsulları sahəsində mühüm irəliləyişlərə imza atmışdır.

Hazırda Azər Vahabzadə Agro Dairy Qrupunda Südçülük bölməsi üzrə İdarəedici Direktor kimi fəaliyyət göstərir. O, südçülük biznesinin əməliyyat, kommersiya və maliyyə fəaliyyətlərinə rəhbərlik edir və “AzProtein” MMC ilə “Dost Agro” MMC birgə müəssisələrində şirkətin maraqlarını təmsil edir.

Əsəd Qurbanzadə Azərbaycan Dövlət İqtisad Universitetində maliyyə ixtisası üzrə bakalavr və bank işi üzrə magistr dərəcələri almışdır. Daha sonra Anadolu Universitetində MBA proqramını tamamlamış və İqtisadi İslahatlar Elmi-Tədqiqat İnstitutunda doktorantura təhsili almışdır. O, həmçinin Çexiyanın Charles Universitetində audit üzrə ixtisasartırma proqramını müvəffəqiyyətlə başa vurmuşdur.

Peşəkar karyerası ərzində “Azərbaycan Beynəlxalq Bankı”, “PAŞA Bank” və “Agro Dairy” şirkətində kommersiya və satış sahələrində müxtəlif vəzifələrdə çalışmış, satış rəhbəri kimi geniş təcrübə qazanmışdır. Əsəd Qurbanzadə eyni zamanda üçüncü “Yüksəliş” müsabiqəsinin qalibidir.

Hazırda Agro Dairy Qrupunun Kommersiya üzrə Baş Direktoru kimi fəaliyyət göstərən Əsəd Qurbanzadə Bitkiçilik, Taxıl Emalı və Heyvandarlıq biznes bölmələrində gündəlik satış, ticarət və marketinq əməliyyatlarına rəhbərlik edir. O, kommersiya strategiyasının hazırlanması və icrası, gəlir artımının təmin olunması, inteqrasiya olunmuş Satış və Əməliyyat Planlamasının inkişafı, eləcə də əkinçilik məhsulları və emal olunmuş taxılların ölkə daxilində və beynəlxalq bazarlarda təşviqi və satışı üzrə aparıcı satış və treydinq komandasını idarə edir.

Elnur Əliyev maliyyə menecmenti sahəsində 15 ildən artıq təcrübəyə malikdir. O, Azərbaycan Dövlət İqtisad Universitetində bakalavr və MBA dərəcələri almış, həmçinin müxtəlif sənaye sahələrində – FMCG, informasiya texnologiyaları, neft və qaz – yüksək səviyyəli maliyyə meneceri kimi 10 illik, “Big 4” auditor şirkətlərindən biri olan PwC-də isə 6 illik təcrübə sahibdir.

Hazırda Elnur Əliyev Agro Dairy Qrupunun Maliyyə üzrə Baş Direktoru (CFO) kimi fəaliyyət göstərir. O, şirkətin maliyyə strategiyalarının hazırlanması və icrasına rəhbərlik edir, strateji məqsədlərə uyğun maliyyə planlaşdırmasını həyata keçirir. Eyni zamanda büdcələmə, maliyyə hesabatları və təhlil, xəzinədarlıq, satınalma, vergi planlaşdırması, hökumət və tənzimləyici orqanlarla əlaqələr, eləcə də informasiya texnologiyaları funksiyalarına cavabdehdir.

Maksimillian Hartiq bank işi və maliyyə ixtisası üzrə universitet dərəcəsinə malikdir. O, “Deloitte” və “Agro Dairy” şirkətlərində əvvəlki vəzifələri müddətində strateji idarəetmə, layihə planlaması və rəqəmsal transformasiya sahələrində mühüm təcrübə qazanmış və dərin sənaye bilikləri nümayiş etdirmişdir.

Hazırda Maksimillian Hartiq Agro Dairy Qrupunun strategiyasının hazırlanması və icrasının əlaqələndirilməsinə, qrup üzrə transformasiya planlarının həyata keçirilməsinə, eləcə də yeni rəqəmsal və innovativ həllərin tətbiqinə rəhbərlik edir.

Fatimə Tağıyeva İnsan Resurslarının İdarə Edilməsi üzrə CIPD Associate diplomuna və Azərbaycan Dillər Universitetinin bakalavr dərəcəsinə malikdir. 15 illik peşəkar təcrübəyə əsaslanaraq, qabaqcıl HR strategiyalarının tətbiqi, rəhbərlik və əməkdaşlar arasında güclü əməkdaşlıq mühitinin qurulması, motivasiyaedici iş mühitinin formalaşdırılması və təşkilati performansın artırılması sahələrində mühüm uğurlar əldə etmişdir.

Agro Dairy Qrupuna qoşulmazdan əvvəl Fatimə Tağıyeva “PASHA Management Company” (PMC) şirkətində iki ildən artıq müddətdə HR Transformasiya Direktoru (Ventures) kimi fəaliyyət göstərmişdir. O, müxtəlif sahələri əhatə edən beş şirkət üçün strateji insan resursları rəhbərliyi təmin etmiş və təxminən 2000 əməkdaşın HR proseslərinə nəzarət etmişdir. 

Bundan öncə isə BP şirkətində uğurlu karyera yolu keçmiş, burada insan resursları sahəsində dəyərli təcrübə toplamış və təxminən 6 il müddətində əmək münasibətləri üzrə fəaliyyət göstərmişdir.

Məltəm Novruzova Bakı Dövlət Universitetində hüquq ixtisası üzrə bakalavr və magistr dərəcələri almışdır. Karyerası ərzində “MGB Hüquq Bürosu”, “Azmade Group”, “Milla Dairy” və “Agro Trade Supply” kimi şirkətlərdə çalışaraq hüquq sahəsində geniş və çoxşaxəli təcrübə toplamışdır.

O, 2018-ci ildən Azərbaycan Respublikasının Vəkillər Kollegiyasının üzvüdür. 2020-ci ildə IFLR1000 beynəlxalq hüquq bələdçisi tərəfindən maliyyə və korporativ hüquq sahəsində “Yüksələn Ulduz” nominasiyası ilə Azərbaycanın aparıcı hüquqşünasları sırasında tanınmışdır.

Hazırda Məltəm Novruzova Agro Dairy Qrupunun Hüquq və Risk üzrə Rəhbəri kimi fəaliyyət göstərir. O, biznes bölmələrinə hüquqi dəstəyin və resursların təmin edilməsinə, risklərin idarə edilməsi strategiyasının hazırlanmasına, uyğunluğun təmin edilməsinə, etika və şəffaflıq prinsiplərinin təşviqinə və normativ tələblərə riayət olunmasına nəzarət edir.

Nəsimi Qurbanov sağlamlıq, təhlükəsizlik və ətraf mühit (SƏTƏM) sahəsində geniş təcrübəyə malik peşəkardır. Bakı Dövlət Universitetində Siyasi Elmlər üzrə bakalavr dərəcəsi almış, hazırda isə Azərbaycan Dövlət Neft və Sənaye Universitetində Fövqəladə Hallar və Həyat Təhlükəsizliyi Mühəndisliyi ixtisası üzrə təhsilini davam etdirir.

Karyerası boyunca “Worley Europe Limited” (BP AGT, CGLP layihəsi) şirkətində SƏTƏM məsləhətçisi, “PASHA Construction” şirkətində Duty/HSE menecer (Ticarət Mərkəzləri), “Prokon” MMC (Nobel Oil) və SOCAR-ın Amonyak və Ürea Kompleksi layihəsində “Samsung Engineering Co. LTD” şirkətində SƏTƏM meneceri kimi fəaliyyət göstərmişdir. Bu çərçivədə o, iri miqyaslı tikinti və sənaye layihələrində təhlükəsizlik əməliyyatlarına rəhbərlik etmiş, risk qiymətləndirmələri aparmış və qabaqlayıcı təhlükəsizlik təşəbbüslərini həyata keçirmişdir. Peşəkar fəaliyyətinə Fövqəladə Hallar Nazirliyində – Xüsusi Riskli Xilasetmə və Tikinti Təhlükəsizliyi Departamentində başlamışdır.

Hazırda Nəsimi Qurbanov Agro Dairy Qrupunda SƏTƏM Rəhbəri kimi çalışır. O, ətraf mühitə dair məsələlərə nəzarət edir, təhlükəsizlik standartlarının icrasını təmin edir və bütün layihələrdə risklərin effektiv idarə olunmasına rəhbərlik edir.